Creative Armenia-ն 2023 թվականին
Առաջ նայելով դեպի 2024 թվականին՝ անդրադառնում ենք նախորդ տարվա 8 ամենանշանակալի ձեռքբերումներին
Դեկտեմբերի 28 2023թ. | հեղ.` Creative Armenia
Ամբողջ աշխարհի հայերի համար 2023 թվականը մարտահրավերներով լի տարի էր։ Վշտով ենք ապրել Արցախի կորուստը, պատկերել ենք ապագայի նոր հավանականություններ և կրկին անգամ սովորել ենք այդ ամենի հետ մեկտեղ համառորեն առաջ շարժվել։
Տարին ավարտվում է և ժամանակն է նշելու այն նախագծերը, ստեղծարար բիզնեսները, հաստատությունները և մշակութային առաջնորդությունը, որոնց շուրջ մեր ստեղծագործ համայնքն արարել է Creative Armenia-ի ծրագրերի շրջանակներում և ոչ միայն։
10 արվեստագետների աջակցություն Fellowship-երի միջոցով
Վերջին հինգ տարիների ընթացքում Creative Armenia-ն ՀԲԸՄ-ի հետ համագործակցությամբ ստեղծված Creative Armenia-AGBU Fellowships-ի միջոցով նոր ստեղծագործողների սերունդ է սնուցում: Այս համապարփակ ծրագիրը տրամադրում է 5,000 դոլար ֆինանսավորում, համաշխարհային առաջնորդների կողմից մենթորություն, ինչպես նաև կարիերայի լայնամասշտաբ աջակցություն։ Fellowship ծրագիրն արդեն նպաստել է 38 արվեստագետների բարգավաճմանը:
Այս տարի 10 արվեստագետներ իրենց տարին անցկացրել են ստեղծագործելով, իրենց ոլորտներում բովանդակալից կապեր հաստատելով և համաշխարհային ուշադրություն հրավիրելով Արցախի և Հայաստանի շուրջ։ Այս տարվա ստեղծագործողներն են՝ լուսանկարիչ և կինոռեժիսոր Ալեքսիս Փազումյանը (Ֆրանսիա), կինոռեժիսոր Ալիկ Թամար Բարսումյանը (Միացյալ Նահանգներ), լուսանկարիչ և կինոռեժիսոր Դիանա Մարկոսյանը (Միացյալ Նահանգներ), վիզուալ նկարիչ Գայանե Երկանյանը (Նիդերլանդներ), վիզուալ նկարիչ Հարություն Թումաղյանը (Հայաստան), ջազ վոկալիստ Լուսինե Եղիազարյանը (Միացյալ Նահանգներ), կինոռեժիսոր Նարե Լեոնե Տեր-Գաբրիելյանը (Հայաստան), գրող և ստեղծագործական պրոդյուսեր Նաիրի Աբրահամյանը (Հայաստան), սաքսոֆոնահար և կոմպոզիտոր Րաֆֆի Կարապետյանը (Միացյալ Նահանգներ) և կինոռեժիսոր Սարին Հայրապետյանը (Միացյալ Նահանգներ, Հորդանան)։
Ցանկանու՞մ եք ավելի լավ պատկերացում կազմել նրանց մասին։ Կարդացե՛ք նրանց հարցազրույցները, որոնցում պատմում են իրենց ստեղծագործական կարիերայի, ոգեշնչումների և գալիք նախագծերի մասին։
Տրամադրվել է 34 մենթորություն
2023 թվականին Creative Armenia-ի և Artbox-ի արվեստագետները հնարավորություն ունեցան հաղորդակցվելու տպավորիչ մենթորների հետ, այդ թվում մրցանակակիր հոլիվուդյան կինոգործիչների, փոդքասթի առաջամարտիկների և հաջողակ բիզնես առաջնորդների հետ։
2023 թվականի Creative Armenia-AGBU Fellow, գրող և պրոդյուսեր Նաիրի Աբրահամյանն իր գաղափարները քննարկեց «This American Life» ռադիո և հեռուստատեսային հաղորդման հաղորդավար և պրոդյուսեր Այրա Գլասսի հետ։ Կինոռեժիսոր Ալիկ Թամար Բարսումյանը խորհուրդներ ստացավ «Lobster» (2015թ.) և «Favourite» (2018թ.) ֆիլմերի խմբագիր Յորգոս Մավրոպսարիդիսից։ Սաքսոֆոնահար և կոմպոզիտոր Րաֆֆի Կարապետյանն անդրադարձավ իր երաժշտական կարիերային ամերիկացի ջազային տենոր սաքսոֆոնահար Սոնի Ռոլինսի հետ, ով ջազի ամենակարևոր և ազդեցիկ երաժիշտներից մեկն է։ Նախադեպերը շատ են։
3 արվեստագետ պարգևատրվել են ստեղծարար կացությամբ
Տարվա ընթացքում Հայաստանից 3 խոստումնալից արվեստագետների պարգեւատրել ենք Բելգիայի Բրյուսել քաղաքում ստեղծարար կացությամբ։ East-West Residency ծրագրի 2023 թվականի մասնակիցներն են՝ նկարիչ Նարեկ Բարսեղյանը, կոմիքսների նկարիչ Շամիրամ Խաչատրյանը և լուսանկարիչ Վահան Ստեփանյանը։
Պողոսյան հիմնադրամի հետ համատեղ իրականացվող այս ծրագիրը թույլ է տալիս Հայաստանի ժամանակակից ստեղծագործողներին խորապես ծանոթանալ Բելգիայի ուշագրավ մշակույթին և հայկական արվեստը դարձնել եվրոպական քննարկումների բաղադրիչ։ Որպես իրենց ճամփորդության մաս՝ արվեստագետները մեկ ամիս կանցկացնեն անկրկնելի Վիլա Էմպենում, հաստատելով կապեր միջազգային արվեստի գործիչների հետ և ստեղծագործելով Եվրոպայի կենտրոնում։
Արվեստագետների ճանապարհորդությանը ծանոթանալու համար հետևեք մեր սոցիալական էջերին (Instagram, Facebook, Twitter և LinkedIn), որտեղ գրի կառնենք և կկիսվենք նրանց հաջորդ տարվա սկզբին մեկնարկվող ստեղծագործական արկածներով։
Տրամադրվել է 500,000 եվրո և ավել ֆինանսավորում մի շարք ստեղծարար բիզնեսների, հաստատությունների և արվեստագետների
Մենք չափազանց լուրջ ենք վերաբերվում տաղանդների և Հայաստանի մշակութային ապագայի մեջ ներդրումներ կատարելուն։ Այս տարվա ընթացքում տրամադրված 500,000 եվրոն վկայում է մեր առաքելության մասին։
Մեր գործընկերների աջակցությամբ՝ Artbox-ը և Creative Armenia-AGBU Fellowship-երը դրամաշնորհներ են շնորհել ավելի քան 50 ազդեցիկ և նորարար արվեստագետների, Հայաստանյան հաստատությունների և բիզնեսների։ Դրանց թվում են մշակութային այնպիսի հսկաներ, ինչպիսիք են Մատենադարանը, Գյումրու տեխնոլոգիական կենտրոնը և Գաբրիել Սունդուկյանի անվան ազգային ակադեմիական թատրոնը։
Բացահայտեք Artbox-ի բոլոր արվեստագետներին, կենտրոնները և բիզնեսները։
Իրականացվել է 4 Artbox ծրագիր
Դրամաշնորհներն ու ֆինանսավորումը Artbox ծրագրի կարևոր բաղադրիչն են, սակայն մեր ստեղծարար ինկուբատորի և աքսելերատորի գործունեության շրջանակը շատ ավելի ընդարձակ է։
2023 թվականին Artbox-ն իրականացրեց իր բոլոր չորս ծրագրերը՝ Incubator-ը, Entrepreneur-ը, Hub-ը, և Accelerator-ը: Տարբեր ստեղծարար ոլորտների կարիքները բավարարելու համար հատուկ մշակված այս ծրագրերը ուղղված են արվեստագետներին, բիզնեսներին և հաստատություններին արդյունավետ գործիքներ և գիտելիք տրամադրելու միջոցով Հայաստանում ստեղծարար տնտեսության խթանմանը։
Ներգրավելով ավելի քան 190 մասնակիցներ, գրանցելով 100% լիարժեք մասնակցության ցուցանիշ և անցկացնելով LEGO®-ի, Tate Modern-ի, The Center Pompidou-ի և այլ մեծանուն հաստատություններ ներկայացնող մենթորների առաջնորդությամբ 72 միջոցառումներ և սեմինարներ՝ Artbox-ը սահմանում է Հայաստանում արվեստի և մշակույթի վերընթաց հետագիծը։
Լավագույն նորությունն այն է, որ 2024 թվականին սպասվում են ավելի շատ ծրագրեր։ Գալիք բաց կանչերին դիմելու համար հետևե՛ք artbox.am-ում արվող գրառումներին։
Artbox-ը ստեղծվել է Creative Armenia-ի կողմից և իրականացվում է Հայաստանում Եվրոպական միության ֆինանսավորմամբ և ՀԲԸՄ Հայաստանի հետ համագործակցությամբ «Կատապուլտ» ստեղծարար ակսելերացիոն ծրագրի շրջանակներում։
Գործարկվել է Artbox կայքը և հարթակը
Այս տարին Artbox-ում կարևոր իրադարձություն գրանցվեց։ Ոչ միայն կյանքի կոչեցինք Artbox-ի բոլոր չորս ծրագրերը և զգալի դրամաշնորհներ տրամադրեցինք, այլ նաև գործարկեցինք ժամանակակից հարթակը, որը հնարավոր դարձրեց ինկուբացիոն ընթացքի ամբողջությամբ թվային ֆորմատով իրականացումը։
Artbox-ի կայքը և հարթակը հարմարեցված են ստեղծարար ինկուբատորի յուրօրինակ կարիքներին։ Հարթակի միջոցով Artbox-ի մասնակիցները և մենթորները հետևում են իրենց առաջընթացին, վարում են սեմինարները և ստուգում առաջադրանքները՝ ամբողջը թվայնացված, կոկիկ դասավորված և հասանելի մեկ վայրում։
Ներկայումս հարթակի հատվածը միայն մասնակիցներին է հասանելի, սակայն կարող եք ուսումնասիրել կայքը, չորս ծրագրերը, արվեստագետների մեր համայնքը և մյուս տեղեկատվական հատվածները։ Ինչպես նաև նորություններին հետևելու համար կարող եք բաժանորդագրվել ինկուբատորի տեղեկագրին։
Հայաստանում քննարկումների շուրջ հյուրընկալել ենք լեգենդար կինոգործիչների
2023 թվականին մեր ամենամյա Creative Armenia շաբաթը հետաքրքիր կերպարանք ստացավ։ Այս ամառ համագործակցեցինք GAIFF Pro-ի հետ՝ Հայաստանում հյուրընկալելու պանելային քննարկումներ լեգենդար կինոգործիչներ Ժան-Պիեռ և Լյուկ Դարդենների և Լավ Դիասի հետ։
Երևանում գտնվելու ժամանակ մրցանակակիր կինոգործիչները կիսվեցին իրենց ստեղծագործական կարիերայի մանրամասներով, պատասխանեցին տեղի ստեղծագործ համայնքի հարցերին և ոգեշնչեցին նրանց ձգտել ավելիին։
Ինքներդ վայելեք զրույցները մեր YouTube-յան ալիքում։
Ներկայացրինք Արցախը արվեստի առաջնաբեմում
Սեպտեմբերի 20-ին, երբ Արցախը շրջափակվեց, աշխարհասփյուռ հայությունը սարսափեց։ Ազգային ողբերգություն, որը բոլորի մոտ հարց առաջացրեց. «Հիմա ի՞նչ է լինելու Արցախի հետ»։ Թեև այս հարցի պատասխանը չգիտենք, այս տարի ևս շարունակել ենք երևան հանել Արցախի մասին կարևոր պատմությունները, որոնք մշտապես ապրելու են։
Որպես այս նախաձեռնության մաս՝ մեկնարկել ենք “Watch, Learn, Share” իրազեկման արշավը, ուղեկցված «Չտեսնված հանրապետություն» վավերագրական ֆիլմի թվային թողարկումով, որի հիմքում մեր «Արվեստագետները հանուն Արցախի» դրամաշնորհակիր Լիկա Զաքարյանի օրագիրն է: Արցախի անկման աղետալի լուրից հետո նաև կյանքի կոչեցինք սոցիալական մեդիայի արշավ, որը շեշտադրում է Creative Armenia-ի արվեստագետների կողմից Արցախի համար ստեղծված կարևոր ֆիլմերը, վիզուալ արվեստը, լուսանկարչությունը, երաժշտությունը և գրքերը։
Շարունակելու ենք անմահացնել Արցախը և պատկերել նրա ապագան՝ մեր արվեստագետների հետ միասին աջակցելով արցախցիներին։
Շնորհակալ ենք Ձեզ 2023 թվականի համար
Այսպիսով՝ ավարտենք տարվա ամփոփումը։
Ամանորին ընդառաջ ցանկանում ենք երախտագիտություն հայտնել մեր ամբողջ ստեղծագործական համայնքին։ Վերոնշյալ ծրագրերը, մենթորությունները և տրամադրված հնարավորությունները իրականություն չէին դառնա առանց մեր գործընկերների, հովանավորների և համաշխարհային ստեղծագործ համայնքի առատաձեռն աջակցության։
Շնորհակալություն մեր 2023 թվականի մի մասը լինելու համար։ Անհամբեր սպասում ենք 2024 թվականին՝ միասին կերտելու հայկական արվեստն ու մշակույթը։
Շնորհավոր Ամանոր և Սուրբ Ծնունդ: