Հարցազրույց Մարիամ Պետրոսյանի հետ
Սերժ Թանգյանի «7 նոտա» երաժշտական մարտահրավերի հաղթող Մարիամ Պետրոսյանը պատմում է իր ստեղծագործության, ոգեշնչման աղբյուրների ու ապագայի ծրագրերի մասին։
Փետրվարի 20, 2018 | հեղ.` Creative Armenia
Դուք նշել եք, որ 30 րոպեի ընթացքում եք գրել այս երգի խոսքերը։ Ի՞նչ զգացմունքներ են Ձեր մեջ առաջացրել այս 7 նոտաները։
Առաջին 7 նոտաների մեղեդին որոշիչ էր երգի տրամադրության համար, որն էլ իր հերթին ստեղծեց բառերի գաղափարը։ Երգը գրելու ընթացքում մտածում էի, որ խոսքերը պետք է որոշակի խորհրդավորություն, հմայք և միևնույն ժամանակ թարմություն պարունակեն։ Ստեղծագերծելու ընթացքում, որպես խոսքերի հիմք, ես կերպարներ եմ ստեղծում։ Կոնկրետ այս երգի կերպարը պետք է շատ աբստրակտ ու անորոշ լիներ։ Ես ցանկանում էի միանգամայն ազատվել սովորական, ստանդարտ ֆորմատներից և ուղղակի վստահել իմ բնազդներին։
Կպատմե՞ք Ձեր երաժշտական կրթության ու կարիերայի մասին։
Ես սովորել եմ Երևանի Կոմիտասի անվան ազգային կոնսերվատորիայում։ 2016թ.-ին ավարտել եմ Վեսթ Լոնդոնի համալսարանը (Լոնդոնի երաժշտության քոլեջը)։ Որպես երգիչ և երգահան՝ ես համագործակցել եմ Անդրե Սիմոնյանի (The Beautified Project), Միքայել Ոսկանյան & Friends-ի, Նիկ Եգիբյանի, Յան Փոսթի (Water Knot), Lazzaro-ի և այլ երաժիշտների հետ։ Սոլո արտիստ լինելը իմ էության մեջ է։ Այնուամենայնիվ, տարբեր արտիստների և երաժիշտների հետ համագործակցությունն ինձ հսկայական հաճույք է պատճառում ու մեծ փորձ է ինձ համար։
Ի՞նչն է Ձեզ վրա ամենամեծ երաժշտական ազդեցությունն ունեցել։
Կարող եմ ասել, որ ոգեշնչման իմ հիմնական աղբյուրները եղել են դասական-օրկեստրային և new-age երժշտությունը, ինչպես նաև երաժշտական, թատերական, սինեմատիկ ժանրերը։
Ի՞նչ կարծիք ունեք մարտահրավերին ներկայացրած այլ ստեղծագործությունների վերաբերյալ։ Կա՞ն երգեր, որոնք Ձեզ առանձնահատուկ են դուր եկել։
Դրանք բոլորը շատ տարբեր են։ Ինձ համար շատ դժվար է միայն մեկի անունը նշել, բայց կարծում եմ, որ Անդրես Մոնտերոյի «Sweet and Spicy»-ն իրոք շատ գեղեցիկ ստեղծագործություն է։
Ապագայի Ձեր նպատակնե՞րը։
Ներկայումս աշխատում եմ իմ առաջին EP-ի վրա։ Կցանկանայի որքան հնարավոր է շուտ սկսել ելույթ ունենալ տարբեր հարթակներում, որովհետև ինձ համար կարևոր է լսարանիս հետ կապված լինելը։ Հաջորդ ամիս պատրաստվում եմ թողարկել իմ առաջին տեսահոլովակը։ Ապագայի իմ նպատակը կամ երազանքը իմ երգերից առնվազն մեկի կատարումն է նվագախմբի հետ։ Ավելի մեծ երազանքս նվագախմբի ուղեկցությամբ ամբողջական CD-ի թողարկումն է։