Սեպտեմբերի 4, 2025թ. |  հեղ.` Creative Armenia

Վահէ Ֆաթթալը այն քիչ մարդկանցից էր, ով հասկանում էր նորարարության նշանակությունը արվեստում: Լինելով հայկական մշակույթի նվիրյալ աջակից՝ նա իր կյանքը նվիրեց արվեստագետներին բացահայտելուն, ոգեշնչելուն և նրանցից մեկը դառնալուն։ Ահա թե ինչու «Վահէ Ֆաթթալ» հիմնադրամի և Creative Armenia-ի համագործակցությունը այդքան բնական ստացվեց: L’Œuvre d’Orient-ի աջակցությամբ մենք մեկնարկեցինք Creative Innovation Fellowship ծրագիրը, որը նորարար արվեստագետներին տրամադրում է ֆինանսավորում, մենթորություն և վարպետության դասեր՝ անհրաժեշտ նրանց իրենց արվեստում նորարարական մոտեցումներ զարգացնելու և սահմաններից դուրս ստեղծագործելու համար։

1942 թվականին Հալեպում ծնված Վահէ Ֆաթթալի գեղարվեստական տաղանդը նրան տարավ Փարիզի École Nationale Supérieure des Beaux-Arts՝ կերպարվեստ սովորելու: Ավելի ուշ նա Լոս Անջելեսում հիմնեց դիզայնի և գովազդի ամբողջական ծառայություններ մատուցող իր գործակալությունը, որը համագործակցում էր զվարճանքի և կորպորատիվ ոլորտների հաճախորդների հետ։ Նրա հաճախորդների թվում է եղել ABC հեռուստաընկերությունը՝ որի համար հանդիսացել է բացառիկ գովազդային գործակալություն 18 տարի շարունակ։ Ինչպես նաև, նա համագործակցել է Հոլիվուդյան «մեծ հնգյակ» կինոստուդիաների, National Geographic-ի, Nissan-ի և UCLA Extension-ի հետ։

Բացի հայտնի նկարիչ, դիզայներ և նորարար արվեստագետ լինելուց, Վահէ Ֆաթթալի ստեղծագործական հոգին միշտ խորապես կապված է եղել հայկական ինքնության հետ։ Նա հսկայական ներդրում է ունեցել բազմաթիվ հայկական շարժումների և արշավների տեսողական ինքնության ձևավորման մեջ։ Երբ ղարաբաղյան շարժումն իր գագաթնակետին էր, նա ստեղծեց հայտնի Արցախի/Ղարաբաղի խորհրդանիշը և պաստառները, իսկ ավելի ուշ՝ նաև դրոշը (1998թ.)։ Վահէ Ֆաթթալը հանդիսանում է «Ոսկե Ծիրան» միջազգային կինոփառատոնի հիմնադիրներից մեկը և ձևավորել է դրա տեսողական ինքնությունը։ Բացի այդ, նա մշակել է «Make It Happen» ազդեցիկ գովազդային արշավը «Հայաստան» համահայկական հիմնադրամի հեռուստամարաթոնի համար և եղել է Armenian International Magazine-ի գեղարվեստական ղեկավարը։ Մինչև կյանքի վերջին օրերը, իր կնոջ՝ Լյուսիի հետ, նա նվիրված մնաց արվեստին, կրթությանը և հայկական մշակույթին։